1 наурыз елімізде жалпыхалықтық мереке – Алғыс айту күні. Осыған орай, Дулати университетінің «Білімгерлер үйінде» 6-11 түнгі оқу залының ұйымдастыруымен «Алғысым шексіз!» атты әдеби кеш өтті. Кеште жатақхана студенттері мен өзге ұлт өкілдері бір-біріне құрмет көрсетіп, ризашылығын білдірді.
  Мерекенің басты мақсатының бірі – өскелең ұрпақты достық, бір-біріне деген құрмет пен толеранттылыққа, отансүйгіштікке тәрбиелеу, Қазақстанда этникаралық келісім мен ұлтаралық қарым-қатынасты нығайту.
  Алғыс айту күні – қысылтаяң шақта бар ауыртпашылықты бірге көтеріп, мемлекет басшысының жетекшілігімен Тәуелсіз Қазақстан құру жолында аянбай тер төккен ел азаматтарының бір-біріне құрмет көрсету күні.
  Алғыс айту күні – қазақстандық патриотизмнің, бірлік пен достықтың жарқын мерекесі. Қазақстан халқы бұл мейрамды алғаш рет 2016 жылы атап өтті. 2016 жылдың 14 қаңтарында Елбасы Нұрсұлтан Назарбаев Қазақстан халқы Ассамблеясының құрылған күнін, яғни 1 наурызды Алғыс айту күні етіп жариялады.